दुर्घटनाबाट यसरी बचे म : प्रमोद खरेल

गायक प्रमोद खरेल शुक्रबार राती ८ बजे सवारी दुर्घटनामा परेका छन् । पर्वत महोत्सवबाट पोखरा र्फकदै गर्दा उनी प्रमोद सवारी दुर्घटनामा परेका हुन् । सवारीको अवस्था हेर्दा गम्भिर दुर्घटना देखिएपनि प्रमोद भने आफ्नो अवस्था सामान्य नै रहेको बताउछन् । आखिर कसरी भयो प्रमोदको दुर्घटना, उनकै शब्दमा :शुक्रबार बेलुकी म र एकजना साथी पर्वत महोत्सव सकेर ट्याक्सीमा पोखरा र्फकदै थियौ । हामी ट्याक्सीमा महोत्सवको रमाइलो क्षण साटासाट गर्दै आउँदै थियौ । अकस्मात हामी चढेको ट्याक्सी अनियन्त्रित भयो । विपरित दिशाबाट आउदै गरेको गाडीको लाइटका कारणले गर्दा चालकले ट्याक्सी नियन्त्रण गर्न सकेनन् । उनले ट्याक्सीको ब्रेक लगाए । यसपछि त ट्याक्सी एक्कासी पल्टियो र ४ बल्ड्याङ खादै एक घरको आगनमा रहेको विजुलीको पोलमा गएर ठोक्कियो । ट्याक्सीको सबैतिरको शिशा लगाएकाले पनि हामी एकछिन आत्तियौ । ट्याक्सी पल्टदै गर्दा सास नै बन्द भएजस्तो भयो । जब ट्याक्सी पोलमा ठोक्किएर गुल्टन रोकियो, मैले ट्याक्सीको सिसा फोरे र बाहिर निस्किए । ट्याक्सीको अवस्था हेर्दा कसरी बाँचिएछ भन्ने लाग्यो । मैले बाहिर निस्किएर कुचिएको ट्याक्सीको फोटो पनि खिचे । स्थानिय बासिन्दाको सहयोगमा हामीलाई पोखराको चिरक अस्पतालमा लगियो । ड्राइभरलाई पनि चोट लागेको थियो । घटना एक्कासी भयो, मैले त केही पनि सोच्न सकेको छैन ।

शनिबार बिहान म प्लेनमा काठमाण्डौ आइपुगे । बाहिर खासै चोटपटक लागे जस्तो देखिदैन, तर भित्र भित्र दुखेको छ । विशेषगरी टाउको र कुममा दुखेको छ । तर पनि हिजोको भन्दा स्वास्थ्यमा सुधार आउँदैछ । घटना हेर्दा म कसरी बाँचे भन्ने लाग्दैछ । तर भगवान र श्रोताको साथले मलाई बचायो ।