भर्जिन ‘छड्के’

उसै त निर्माता माधव वाग्ले कुनै पनि कार्यक्रममा चर्किन धेरै बेर लगाउदैनन् । झन् आफैले निर्माण गरेको सिनेमाको कार्यक्रममा उनको चर्काई नहुने कुरै भएन । चलचित्र ‘छड्के’को प्रदर्शनको एक दिन अगाडी आयोजना गरिएको पत्रकार सम्मेलनमा निर्माता वाग्ले मझैले कड्किए, तर रमाइलो तबरले ।उनले पत्रकारलाई प्रश्न सोध्नुहोस् भन्दै कराए । पत्रकारले प्रश्न नसोधेपछि उनले नामै तोकेर भने, प’त्रिकामा त लेख्नुहुन्छ, सोध्नुहोस् न मलाई प्रश्न ?’ माधव वाग्लेले यसो भनिरहदा कार्यक्रम हल हाँसोले गुञ्जयमान भयो ।

निर्देशक निमग श्रेष्ठले चलचित्र प्रदर्शनमा आएपछि मात्र मुख खोल्ने भन्दै केही बोलेनन् । नायिका नम्रता श्रेष्ठले पनि निगमकै भाषा दोहोर्‍याउदै सिनेमाको बारेमा मुख खोलिनन् । यता कलाकार दयाहाङ राइले छड्केको निर्माण कसरी भयो भन्ने बारेमा रमाइलो प्रसंग सुनाए ।कार्यक्रममा चलचित्रको अडियो बिमोचन पनि गरिएको थियो । कार्यक्रममा कड्कदै बोलेका निर्माता वाग्लेले भने, ‘मेरो सिनेमा कतैबाट पनि प्रभावित छैन यसैले यो भर्जिन छ ।’ उनले सिनेमालाई पनि भर्जिनको संज्ञा दिदा धेरैले अचम्म मानेका थिए ।

पि्रन्सेस मुभिज र रस ताण्डवको संयुक्त व्यानरमा तयार भएको यो सिनेमामा सौगात मल्ल, नम्रता श्रेष्ठ, दयाहाङ राई, अर्पण थापा लगायतका कलाकारको अभिनय छ । शुक्रबारबाट एकसाथ प्रदर्शनमा आउन लागेको यो चलचित्रले ओरालो लागेेको सिने नगरीलाई माथी उकास्ने आशा गरिएको छ ।